An dlí ag dul ar iar-Aire Gnóthaí Inmheánacha

Seo an nuaíocht is aistí dá dteachaigh ar fud na Fionlainne le fada an lá: tá an dlí le cur ar iar-Aire Gnóthaí Inmheánacha na Fionlainne, Kari Häkämies, agus é á chúisiú in ionsaí agus i mbatráil den chineál thromchúiseach. Is é sin, dealraíonn sé go bhfuil an fear áirithe seo i ndiaidh léadhbairt chomh mór a thabhairt do dhuine éigin is nach bhfuair sé biseach iomlán ina dhiaidh sin. Ós rud é gur thabhaigh an fear míchliú nach beag i súile na homaighnéasach agus na n-intleachtóirí liobrálacha agus é ina Aire roinnt mhaith bhlianta ó shin, beidh lucht an ghrinn ag inse scéilíní fán dóigh ar ghlac Häkämies páirt, mar dhea, i scléip fhoréigin na maolchloigneach agus iad ag tabhairt greidimíní d'fheileacán éigin; ach dáiríribh, sílim go bhfuil an scéal i bhfad níos measa fós. Nó thit an choir amach chomh deireanach leis an bhliain anuraidh, nuair a bhí Häkämies ar an fheidhmeannach ab airde i Roinn na nGnóthaí Inmheánacha - permanent secretary nó "buanrúnaí" an leagan Béarla a úsáideanns sé féin mar aistriúchán ar a theideal - agus is dócha go rabh baint ag an choir lena obair. An bhfuil sé, mar shampla, i ndiaidh céasadh a cheadú nó a ordú?